ᔮᔅᒥᓐ ᐃᓕᓴᐱ ᐅᕋᑦᕘᓐ ᐊᓂᒍᐃᓚᐅᕐᓯᒪᔪᖅ ᐃᓕᓐᓂᐊᖅᑕᖓᓂᒃ ᐅᕙᓂ ᓄᓇᕗᒥᑦ ᒪᓕᒐᓕᕆᓂᕐᒧᑦ ᐃᓕᓐᓂᐊᒐᒃᓴᓂ ᐊᒻᒪᓗ ᓇᓗᓇᐃᒃᑯᑎᖃᓕᖅᖢᓂ ᔫᕆᔅ ᑖᒃᑐᕆᑦ ᐅᕙᙵᑦ ᔫᓂᕘᓯᑎ ᓴᔅᑳᑦᓱᐊᓐᒥ. ᐃᓕᓐᓂᐊᕐᑎᓪᓗᒍ ᐃᓕᓴᕆᔭᐅᔾᔪᑎᑖᖃᑦᑕᓚᐅᕐᑐᖅ ᐃᓕᓐᓂᐊᕐᓂᖓᓄᑦ ᐱᕙᓪᓕᐊᓂᖓᓂᒃ ᐊᒻᒪᓗ ᓄᓇᓕᖕᓂ ᐱᓕᕆᖃᑕᐅᕙᖕᓂᕐᒧ ᐃᓚᖃᖅᖢᓂ ᐆᒥᖓ ᐳᕌᑦ ᐴᒡ ᐊᒻᒪ ᐳᕋᐃᐊᓐ ᕉᕝᔅ LGBT ᐱᔪᓐᓇᐅᑎᓄᑦ ᐃᓕᓐᓂᐊᕈᑎᒃᓴᓂᒃ (Brad Berg & Brian Rolfes LGBT Rights Scholarship). ᔮᔅᒥᓐ ᐱᓕᕆᖃᑎᖃᕐᓯᒪᔪᖅ ᐆᒥᖓ ᓛᓴᓐ ᓚᓐᑎᐊᓪ LLP ᐊᒻᒪᓗ ᓄᓇᕗᒻᒥ ᒪᓕᒐᓕᕆᓂᕐᒧᑦ ᑲᑎᒪᔨᓂᒃ. ᑎᒃᑯᐊᖅᑕᐅᓯᒪᓪᓗᓂ ᓄᓇᕗᒻᒥ ᑭᒃᑯᑐᐃᓐᓇᐃᑦ ᐱᔪᓐᓇᐅᑎᖏᓐᓄᑦ ᑭᒡᓕᓯᓂᐊᖅᑎᓄᑦ 2017-ᒥ, ᔮᔅᒥᓐ ᐃᒃᓯᕙᐅᑕᐅᓯᒪᔪᖅ ᐱᒋᐊᖅᖢᓂ 2021-ᒥ.

ᔮᔅᒥᓐ ᐊᕐᕌᒍ ᖁᓕᓂᒃ (10) ᐱᓕᕆᐊᖃᕐᓯᒪᔪᖅ ᐃᓅᖃᑎᒌᖕᓂᒃᑯᑦ ᐊᑐᐊᒐᓕᕆᓂᕐᒥᒃ ᐊᒻᒪᓗ ᐱᓕᕆᐊᒃᓴᓂᒃ ᐅᑯᓄᖓ ᑐᕌᖓᓗᐊᖅᑐᓂᒃ ᓄᓇᖃᖅᑳᖅᑐᓂᒃ ᐊᕐᓇᓂᒃ, ᐃᓅᓱᒃᑐᓂᒃ ᐊᒻᒪ ᐅᑯᓄᖓ 2SLGBTTQ+ ᐃᓅᖃᑎᒌᓄᑦ. ᒫᓐᓇ ᑲᑎᒪᔨᐅᖃᑕᐅᔪᖅ ᓄᓇᖃᖅᑳᖅᑐᑦ ᐃᑲᔫᑎᒃᓴᖏᓐᓄᑦ ᐊᒻᒪᓗ ᐊᖓᔪᖅᑳᕐᒧᑦ ᑐᒡᓕᕆᔭᐅᓪᓗᓂ ᐅᑯᓄᖓ ᑲᓇᑕᒥ ᓄᓇᖃᖅᑳᖅᑐᑦ ᒪᓕᒐᓕᕆᓂᕐᒧᑦ ᐃᓕᓐᓂᐊᖅᑏᑦ ᑲᑐᔾᔨᖃᑎᒌᓄᑦ ᐊᒻᒪᓗ ᑎᑎᕋᖅᑎ ᑮᓇᐅᔭᓕᕆᔨᐊᓪᓗᓂ ᐅᑯᓄᖓ ᐊᒪᐅᑏᑦ ᐃᓄᐃᑦ ᐊᕐᓇᐃᑦ ᑲᑐᔾᔨᖃᑎᒌᓄᑦ.

ᑭᖑᓂᐊᓂ ᐱᓕᕆᐊᖃᕐᓂᑯ ᑐᑭᒧᐊᖅᑎᑦᑎᔨᒧ ᐃᑲᔪᖅᑎᐅᓪᓗᓂ ᐃᓄᓕᕆᓂᕐᒧᑦ ᐊᒻᒪ ᐃᓕᖅᑯᓯᓕᕆᓂᕐᒧᑦ ᐱᕙᓪᓕᐊᔪᓕᕆᓂᕐᒥᒃ ᓄᓇᕗᑦ ᑐᙵᕕᒃᑯᓐᓄᑦ, ᐊᖓᔪᖅᑳᒧᑦ ᑐᒡᓕᕆᔭᐅᓪᓗᓂ ᐃᓵᒃᓯᒪᒋᑦ ᐃᓅᓯᕐᒥ ᑲᑐᔾᔨᖃᑎᒌᓄᑦ, ᐃᒃᓯᕙᐅᑕᐅᖃᑕᐅᓪᓗᓂ ᐃᓄᖕᓄᑦ ᐅᑯᓇᓂ ᓄᓇᖃᖅᑳᑐᑦ ᑲᑎᒪᔨᕐᔪᐊᖏᑦ ᐊᓴᐱᒧᑦ (HIV/AIDS), ᐊᒻᒪᓗ ᐱᒋᐊᖅᑎᑦᑎᔨᐅᖃᑕᐅᓪᓗᓂ ᑲᓇᑕᒥ ᓄᓇᖃᖅᑳᖅᑐᑦ ᐃᓅᓱᒃᑐᑦ ᐊᕐᓇᐃᑦ ᑲᑎᒪᔨᖏᓐᓂᒃ.

ᔮᔅᒥᓐ ᐃᓱᒪᒋᔭᖃᒻᒪᕆᖕᒪᑦ ᐊᑐᓕᖁᔨᓂᕐᒥᒃ ᐅᓗᕆᐊᓇᙱᑦᑐᒥ ᐊᒻᒪ ᖃᓄᐃᓐᓇᙱᑦᑐᒥ ᓄᓇᕗᒻᒥᐅᓄ ᒪᐅᓇ ᐊᑐᓕᖅᑎᑦᑎᓂᒃᑯᑦ ᐆᒥᖓ ᑭᒃᑯᑐᐃᓐᓇᐃᑦ ᐱᔪᓐᓇᐅᑎᖏᓐᓄᑦ ᒪᓕᒐᖅᒥ. ᐊᔪᕈᓐᓃᕐᓴᖅᓯᒪᓪᓗᓂ ᐱᓕᕆᔪᒪᓂᒃᑯᑦ ᐋᖅᑭᒃᑎᑦᑎᔾᔪᑎᓕᕆᓂᕐᒥ ᐊᒻᒪᓗ ᐃᖅᑲᖅᑐᐃᓂᒃᑯᑦ ᖃᓄᐃᓕᐅᕈᑎᓕᕆᓂᒃᑯᑦ.